2020最堅的旅途~罾棚角咀

My dream place @罾棚角咀

是咁的 – 兩年多前我已相中呢個地方 (真係講左好耐, 好像已是上一世紀的事)，在西灣山後一處了無人煙的岬角～罾棚角咀～然而因為一直解決不到由浪茄至浪茄仔的崎嶇路段，所以遲遲沒有起行～

呢個本來係今年初春重點試行既路段，出發日卻一改再改，心動不如行動, 你永遠很難找到一個100% prefect既時間, 這天雖頂著28度高溫，最終也決定出行吧！（不然又要多等至年底天涼的時候）

要去罾棚角，可由東壩出發，至浪茄抄小路至浪茄仔，到罾棚角後，經西灣山至西灣亭作結，反之亦然～

朋友仔認為, 由東壩出發較為可取, 因為如果在浪茄小路發覺唔對路時, 退出會比較方便, 盡管多數人會在西灣山那邊出發, 我們始終唔熟路, 還是揀個有退出點的路走吧~

食個晨早早餐, 因為迢長路遠, 唔飲茶了~當時仍然係限聚令, 但竟然都係爆滿啊!

但因為肚子不舒服, 又等左好耐車, 入西貢又大塞車!! 攪到11點45分才去到西貢市中心!

即刻飛的入東壩, 好彩等幾架就上到車，去到東壩勁多人, 但不幸地又要處理公事, 呢日攪咩呢!

雖然已好晏，但東壩太美了，忍不住要影相留念

真正起行已經12點45分了! 明明我已經係早上7點幾出門口！！！

由東壩至浪茄一段，景色優美，雖然今天它們都不是主角，而且也行過好多次，但也忍不住不停影相!

前方最右手邊的咀(影唔哂), 就係今日既目的地~罾棚角咀, 就這樣看好像不太遠吧.......

 浪茄灣真係好靚啊

 一路向下,感覺還有點輕鬆

 

用了半小時去到浪茄, 呢日勁爆多人

 

 山竹的威力

我地即將轉入人少既路線了 (之後幾乎見不到人, 始終罾棚角非熱門而且係難度高的路線)

在浪茄盡處會找到兩、三段山腰小徑往浪茄仔（此時亦正式離開麥徑），找條容易點上的便是了

呢日的好幫手，因為罾棚角有很多要爆林的地方 (我係第一次真正爆林啊)

現在也開始要小小爆林

呢條係較為難既上山路, 我地揀左另一條容易些的

回望浪茄, 真係清到見底

 非正式路線, 始終不容易行啊

不多久便可近望罾棚角咀及附近的岬角（當然仍是迢長路遠），[罾棚角在右上角)

 

 

見到罾棚角半島！你也不能說不遠, 天氣亦熱到一個點

 

唯越近浪茄仔，山徑便越來越窄，只容一人身經過，我地還見到幾個遊人折返（他們其實是走錯路，本應去麥徑行西灣山，卻走來了這段碎石路, 但他們告訴我們前面勁難行, 所以要折返）我們其實一早知前面大概景況，所以這麼多年也不敢行，聽他們說完就更擔心！

沿著浮沙碎石路，一邊是山，一邊就是懸崖，感覺真是有點汗顏，而且天氣很熱，不停流汗，也不知是冷汗還是甚麼了，

去到呢到已貼近懸崖，我收起了相機，專心去行, 抓著旁邊的樹，或蹲或站，又要坐或爬過去，總之係一步一驚心！

眼前浪茄仔很美, 卻無心情欣賞, 只管留心的走

 

爬了一段時間，差不到到底,但此時變成了接近垂直的斜路,(後來我們知道行錯,應該再行前少少才落山, 我地行錯的是捷徑) ,雖然側面有條前人縛了的繩索借力, 但大家也知不能盡信它, 因為不知是否安全或是否已風化, 此時退又不是, 進也不是! (註:經驗豐富的人就應該無咩問題, 只係對我地這些新手確實係難!)

幸好大家專心致志，一步一步爬下去，最終還是克服過來，成功抵達了無人煙的浪茄仔, 當刻又係攰又感動!!!

我地就係係上面爬落來

 現在再看這張相, 我究竟係點樣落到來架呢

（我一直以來最關心只係呢個路段，以為攪掂左之後就容易,但少年也實在太年輕了）

浪茄仔堅係水清見底，但沙卻不幼，

 

 呢度就係有條比較正路的小徑可以下來的, 我地行錯了

係呢度小休一輪，就出發登上罾棚角半島山脊，當時已經係下午2時45分, 太陽正高高掛! 好熱!

 

 

上山路有一定坡度，且沒有樹蔭，走起來會很辛苦(這天其實只有28度, 已經辛苦到一個點)，走左廿來分鐘, 我突然覺得有點暈, 即刻打傘坐下來, 飲了很多水,抖左陣, 真係有少少中暑感覺, 所以如果大家行山突然開始有少少不適,千萬別夾硬繼續, 寧願抖下再看看情況

 感覺很漫長

 

 不時回望浪茄和浪茄仔, 給自己多點力量!

好彩抖左陣便ok, 網上話有兩條路可通往長岩頂,有條易d有條容易點, 但我地唔太分到, 大抵朝著靠罾棚角一邊, 沿絲帶(有時也靠下方向感), 大約走了１個多小時便可到長岩頂!

就係呢個位! 

左邊會有長岩頂, 回程要走上的

我地向右邊罾棚角咀前進

好靚呀! 

沿平緩前進～呢段路相對好走!

不多久便見到罾棚角咀對出的飯甑洲，真的很滾動！終於也來到了！這裡還可看到標尖角和較遠的破邊洲。

我地係度食午餐, 已經4點幾了! 

然後再向前推進

 

 

至此三面環海、奇石處處，且岬角險要，像天涯海角，如入無人之境～呢度係我地今日的最遠點

罾棚角有3個咀，但因時間有限，今次無法出咀了，要在入黑前離開啊！（當時矢志下次一定會出咀？）

差不多4時50分, 真的要走了, 那怕還未影夠相, 未休息夠!

沒有想到回程是另一場艱辛的路途，是漫長征途的開始，越過長岩頂，山頂緩緩而上，但走得片刻，便要開始爆林，某程度這段路真的較少人行吧，

右邊是睇魚岩頂, 今次無法上去了!

 

 回望罾棚角咀,我們真的行了很遠

眼見前面還有很多個山頭 (我一直以為一路向前便可抵西灣山, 始終方向感不足!)  

游走浮沙碎石路，少點力氣也不成，我不知自己坐下了多少遍，流了多少汗，有好幾次覺得自己走不下去，甚至是突然坐在地上, 或者跌低!! 太累了!  

滿山也是車輛梅, 我卻沒心情去看, 只是不停趕路, 因為堅不想在黑夜中爆林（對我們這種廢中青來說! 似乎沒可能吧!），

雖有絲帶指引，但有些路還是不太清晰！暴走約１小時，終於眺望到長咀，天色亦開始昏暗, 已經係六點了! 

終於見到長咀及蚺蛇尖!!!此時才發現西灣山在左邊!!  (原來不是前面!! ) 

  說實在，當時天色已昏暗，看著眼前的西灣山，我終究知道真正的方向！那太恐怖了！當已經力盡筋疲之時，我們還要繼續爬升！朋友仔當時說面前是一幅大牆，我倒覺得是海市蜃樓! 朋友仔當時還說, 應該攀升一半便有小路可前往西灣山, 我卻深知係要爬升至最高點! 因為我們是要去西灣山的標高柱! 但我不敢刺激朋友仔了, 便沉著應戰, 繼續向上走, 但當刻我真的想喊出來！然後又是不停上斜及爆林！

終於我們由罾棚角離開時，歴2個多小時的爆林，終於返抵西灣山！重回麥徑了! 那時是晚上7時10分!!!! 天空亦變黑了!!

西灣山標高柱

 

抬頭望上空, 竟沒有太大星星啊!

旅程當然沒有完結，我們要從西灣山走1 個小時的山路才可返回吹筒拗，但這段路因為已走過及一路向下(最重要昰不用爆林)，感覺當然舒坦很多，而整座西灣山也沒有燈光, 證明沒其他遊人!

臨抵吹筒拗朋友仔又說我行錯, 幸好在摸黑情況下, 有google map幫下手, 證明沒行錯! 終於急步走了一小時抵達吹筒拗

今次醒目地在吹筒拗call定的士，（西灣亭沒有訊號的），但口快快同call台講20分鐘出到去, 平時要行最少半小時! 唯有在累極的時候再急步扯出去, 真係人都顛! 累得緊要!

趕到去西灣亭,見到另一的士,但不同於我在call台預約的, 原來我們的士接了另一批客人走(即調轉了) , 我們本身的一架最終折返, 調換返, 嗯, 呢個司機解釋話因為那批客(外國人)堅持上佢車, 但明明call台已問定我姓咩同有幾多人,點可能連國籍也攪錯, 呢個司機古古惑惑的~Anyway, 有車已經好好, 我真係爬不動了, 其時已經係晚上八時半,,至此結束接近8小時的海角之旅。返到西貢再轉小巴出旺角, 已經差不多十點! 我爬了兩口麵, 真的攰到甚麼也吃不下(雖然個雲吞好好食), 然後又等了半小時車, 終於在晚上11時半回到家!!!!真係邊有人行山會行到咁夜!!

今次出行，與兩年前的分流之旅, 一樣難忘~無論天氣(太熱)、狀態(只有75分,不是大勇個種)、策略(輕視了路途的遙遠及難度)也不似預期，雖然還了多年心願，但感覺其實是好辛苦的, 個晚返到屋企失眠呢～最主要難忘的地方, 係行去浪茄仔, 我地欠缺經驗, 回想過來, 當刻其實幾危險, 而去到了罾棚角，卻沒有出咀，亦沒時間靜靜欣賞極地之景，始終是美中不足。最後係時間拿捏得不好, 差不多要摸黑爆林, 那爆林的兩小時真係人都顛, 我的手也被樹枝界了很多條痕, 腳也瘀了一大塊片, 如此爛的體能，確實無法再下一城，遠征更多心儀的地方～

罾棚角無疑是一條高級路線, 對於新手或經驗不多者實在不宜, 但只要多加訓練體能、做多些資料搜集, 帶備足夠糧水, 有好的天氣好的身體狀態, 如此隱世美景實在值得一去

至於我們會否再去?(似乎是淆底了), 哈哈, 走著瞧吧

而小小的人趁收爐的幾個月，還是好好鍛鍊下心肺功能吧

路線：東壩—浪茄—浪茄仔—罾棚角咀—長岩頂—西灣山—吹筒拗—西灣亭

需時：約5.5小時 (廢中青卻用了接近8小時)

難度：4.5星 (以5星為最)

景觀：4.5星 (以5星為最)

長度：11公里

不可小覷

流了一公升的汗

隊友的鞭策何其重要總會不停騙你就快到

山系阿禪

最堅的旅途

天涯海角

下一站長咀,你理得我吖