終於講到3月的行山記
呢日朋友仔隻腳唔多掂(唔掂左好耐??), (執筆之日仲甘, 唉)但始終情繫山水, 而我本身呢個月既腹痛情況嚴重左好多, 痛足十三日, 稍為停止了幾天, 我地仍然決定去行山, 我地真係好瘋狂
因為腹痛關係,一直沒有請假, 見呢個星期六情況好轉,就決定係附近行(新界西還有淨土嗎?)我好怕多人, 呢一年行山就算閒日請假去也是人滿之患, 咁呢日係假日又會如何呢?
其實呢日係有紀錄以來最炎熱的春分，29度高溫，濕度也極高，我地最終走左去行香港三尖之一的青山 (真係好堅, 一個肚痛一個腳痛)
食個早餐先, 未夠九點茶記已坐滿行山客
青山（又名杯渡山）高583米，最簡單的方法可以由杯渡路經青山寺沿天梯登頂，然後沿路折返。因為想遠眺一下青山腹地的神秘面紗，這次選擇一條較崎嶇的路線，從良田坳登青山。 (其實我對呢座山感覺一般, 只是朋友仔想去, 就去下吧)
起點為良景邨,
呢度係入口
我已有十年沒走過這段路(以前會去菠蘿山晨運, 媽媽有腳患後便沒去了), 一路上斜, 好多人, 唔敢除口罩, 天氣又熱, (以前行也會氣牛如喘, 今天以為自己體能好左, 點之好像都係好辛苦?)
走約30分鐘的石屎斜路便可到達良田坳的三條分岔路口，堅多人, 好像秋季大旅行咁，相信大部份也是去大峽谷的
由此處望右邊是往圓頭山（連走圓頭山及青山就是遠足界所說的杯靈雙渡考牌路線），中間的石屎路為前往大峽谷及下白泥(我以前是走這段)，
左邊上山路便是往青山山頂。 （遠望青山，真係迢長路遠）
我要食下野
從左邊上山開始的路段，為非官方路線，且全是浮沙碎石的劣地，雖不及蚺蛇尖陡峭，但也甚不好走。而且支線甚多，必須以山頂發射站為定點，免錯走有迷宮之稱的青山腹地。
我的新造型，還有新的行山鞋，呢日表現幾好，沒有跣過
我走了十五分鐘已經得好辛苦, 幾乎係每十分鐘就要抖一抖, 中途見到一班人, 有一個女仔想中途折返(佢話好像想中暑), 但經朋友鼓勵, 又繼續前行 (但如果覺得好唔舒服係咪應該折返?)
神秘的青山腹地
還遠眺到蠔田
完全沒有樹蔭, 呢段路只能秋冬來
竟然有我的車輛梅
我第一次見到咁多野生杜鵑, 還要在崖邊! 原來呢段路線可以賞花！
其實呢條路線很短，但無論行左幾耐我都仲見到個起點，上左幾多個山頭我仍然見到自己的住所，坡度真係唔講得笑，是鍛鍊體能與意志的絕佳路線。
因為劣地關係，比較適合上山，調轉由青山落山而到良田拗, 難度會倍增）
呢日溫度甚高，而整個路段幾乎是零樹蔭，不停休息不停飲水，這個時候不求速度，而是要避免中暑。我地已經每人帶了超過1.5L公升水,感覺都有點唔夠咁
完全沒有樹蔭，唯有求其在石上吃乾糧
上上落落
太陽很勁，腹又開始痛，好熱，人真係有點暈陀陀
途中遇上飛行服務隊在前方進行拯救行動，希望傷者沒有事吧（不會是剛才的女仔吧？？）。
我真的不知自己抖了多少次，真係好熱
咁難既路線，遊人也多，但相對上次去大枕蓋還算是比較少人一點點
途中朋友仔隻腳好唔掂，抽了幾次筋，真係要休息下了，好彩佢都堅持到
終於到了第一個標高處（仍未到青山）這時遊人開始少了，想必大家都已行完，我地仍未到頂！
但呢個位好靚呀，好多野生杜鵑花，真的很美，沒想過這樣的劣地會有咁靚既花！！
看到黃金海岸乃至港島
另一邊是屯門乃至天水圍元朗
對面是九徑山？
這邊就望到機場
住左係附近咁多年，我第一次上青山！
已經快要日落，美不勝收
不過呢度都真係幾高幾斜又近懸崖，影相真要留神
朋友仔好腳痛，就係度抖左陣
然後一路下山，多是樓梯級，我地慢慢行也走了個多小時
青山禪寺
至此路結束
當然係要犒賞下自己啦
打邊邊真開心
青山一帶雖為劣地地質，但景觀甚好，將東西兩方完整分隔，東面可看到屯門天水圍的景色，天氣好時更可看到港島一帶，西面就可俯瞰神秘錯綜複雜的青山腹地、白泥蠔田甚至是機場的景色。
雖然說係劣地，但滿山也是盛開的杜鵑花，仲有我最喜歡的車輛梅，係整個旅程最令人驚喜的地方。因為腳程慢，本身打算日落前可下山，最終可以睇埋日落（好多人上青山也是為了看日落），個咸蛋黃又真係好靚呀，雖然行得好辛苦，但總算係大滿足。 從前總聽人說青山是一條絕景路線，神秘、壯麗、巍峨，雖我不至於覺得它是五星星，但從360度可一覽如此多美景，確是值得前來走一趟。
註: 一星期後青山一帶又發生嚴重山火, 令人心碎, 希望大家要好好愛護大自然
路線：良景邨、良田坳、青山、青山寺、青雲路 需時：正常是5小時(我就用了接近8小時, 哈哈, 太熱了, 朋友仔又腳痛, 實不宜急)
難度：4/5星
景觀：3.5/5星
長度：約7公里
#山系阿禪 #最曝曬的旅途 #三月杜鵑花 #神秘的青山腹地
絕對係冬天的線路😊
回覆刪除很艱辛的路
刪除