3月的時候天氣已經開始回暖，小小的人怕凍但更怕熱（係呀係好麻煩的人），行山運動似乎很快要停停，要等秋天再臨先可以再起動喇。咁呢次2018春天收爐之作想搵d新路線走走，我一直情繫西貢，就係西貢埋手啦，而呢次我又好快相中左位於西貢的罾棚角咀，好可惜搵左好耐資料，發覺要去罾棚角咀必須要經過一d峭壁同手腳並爬的路段（可能有捷徑或其他方法，但我地係網上始終搵唔到可以避開呢d路段既路線，除非繞一個超級大圈），咁最終考慮到體能、天氣與技術，覺得仲未係時候（貼近峭壁行wow，恕我淆底喇。老友，做人要識驚架，係咪？），決定放棄罾棚角咀，搵番d輕鬆點的路線，最終決定行附近的西灣山。
因為要趕乘西灣亭的車，所以又係要吃過快早餐。
我地都係去西貢市中心轉乘29R，雖然已經提早到達，但可能呢日係假期，勁多人，上不到預定的班次，不過因為假期，佢加開左好多班車，所以等左一陣就可以上車（非假期班次極小，而且座位不多，大家如平日去要check定班次，否則要乘的士入去喇）
車程約半小時到達西灣亭，起行！
呢日其實已經有26,27度，而且太陽高高掛，走了一會已經開始覺好熱，好美的萬宜水庫～
我就是愛影花
因為呢段路已行過好幾次，所以比較行得快些，想留多些時間在後頭～
上埋呢段路就去到吹筒拗，由西灣亭出發至此約二十至三十分鐘～
今次去到呢度吹筒拗之後我地就唔係落去大浪西灣，改而轉右登上首次行的西灣山～
你也不能不說甘
一路向上爬
哂到一個點，好彩好快有好風景
呢度可以望番萬宜水庫
D汗係沒有停止的滴下繼而流下
回望過去真係唔知轉左幾多彎
朋友仔一向唔太怕熱，佢都要打傘，可想而知有幾熱啊！！呢段路夏天來有咩可能行到！
因為真係好辛苦，一路都無樹蔭，但為減去背包的重量，哂住都要食番條蕉，補充下！
呢日游人如鯽，個個都行到汗流浹背，嗌哂救命，不過呢d亦係行山最好玩既地方，一路嗌辛苦，但又會一路向上爬
其實整條路段不算太難，只是不斷向上，但有些路段也有接近45度的斜度，最攞命係全程都幾乎沒有樹蔭，夏天來恐怕很容易中暑，一定要有足夠糧水同做好防哂準備。（我就肯定夏天不會來了）
終於用左接近兩小時才上到300 m的西灣山，呢度可以見到我最愛既大浪四灣（包括西灣、鹹田灣、大灣同東灣），真係又是驚艷啊，第一次由咁高角度看四灣，真係好靚啊！！
呢個亭坐滿了走得快要斷氣的行山人士，大家都哂得面紅紅的。我地都抖了很久。呢度可以遠眺萬宜水庫，真係好山好水～～
吃下餅乾
之後就下山往浪茄方向進發，
之前我們一直向上爬，而家就是不斷向下降，原來向下降也不容易，很多碎石，一點也不好走。途中遇上幾個少年由浪茄方向上來西灣山（按：往西灣山主要有兩個方法，一是好像我們由西灣亭出發，另一方法則是由東壩經浪茄出發），他們邊走邊爆粗，問點解咁耐都未上到山頂, 朋友仔忍不住對我說：’而家d細佬真係好唔捱得”，但隨著我地不停下行，路很斜又很多碎石，我都忍唔住同朋友仔講：＂我好明白點解要爆粗，真係太瘋狂了！＇當時真係熱到一個到，攰到一個點啊！
我見到罾棚角咀喇！！可惜今次只能係遙遙咁望下你
不久就找到進入睇魚岩頂、罾棚角咀的小路，呢度真係有危險的告示牌，不過我地都只能遠觀，因為真係太遠，難度對我們這些身手來說也實在太高，都係望下當去左算喇，不過咁樣望到我已經好開心，有機會一定會來到！
沿路朋友仔都死心不息，因為佢一路見到有人行去罾棚角咀，佢地究竟係點樣做到呢＞
一路向下, 與罾棚角咀越來越近似的, 圖中最出的陸地就是罾棚角咀, 確實只能遠觀
呢張相我好喜歡，我係望住罾棚角咀架，雖然去唔到, 如果唔係咁熱咁哂, 我估我係度可以坐好耐
再下行更可清晰望到浪茄仔，比其大佬浪茄似乎更加水清沙幼～如果可以去到游水真的太幸福了吧（但要去浪茄仔就要行我之前講那些峭壁和手腳並用的路段）圖中的小沙灘就是浪茄仔了
呢度另一邊就是浪茄
這幅左邊是罾棚角咀右邊是浪茄
整個西灣山的風景又可以用驚艷來形容，西貢真是香港最美的地方，它永遠也不會令你失望～行到呢度我同朋友仔都覺得就算很辛苦也不枉此行～
繼續下行,這裡有一個亭可以休息下
這裡可近距離望著罾棚角咀同浪茄仔, d水係清到一個點, 係極清, 仲要係一粒人都沒有!!!!!!可惜我地唔知點樣落去!!
係呢度, 已經係下午四點幾,有兩個後生女剛從東壩而來, 想去西灣山, 朋友仔叫佢地折返, 因為路途太遠,怕她們趕不及西灣亭的尾班車(西灣亭沒有訊號, 召的士係好難召到的), 不過我就覺得後生可畏, 我地行的慢, 但佢地應該無問題, 最終兩位女生決定一博, 繼續上西灣山,希望我無老點佢地啦, 不過我地係到抖緊時,佢地一口氣已扯上了一大段路, 應該無問題的(呢個阿嬋好不負責任~~)
下行至浪茄，呢日很多人來露營，海水確是清到一個點，不過都已經再沒有力氣去周圍逛逛～
期間有船家話可以載我們番出西貢碼頭，每位120蚊，咁我地一心想去東壩看星星，雖然真係好攰，都決定唔搭了，然後再抖擻精神，再上番100m終於去到東壩，
時間本來剛好，可以睇星星，不過呢日雲太多，應該無咩希望，決定離開
～係東壩call的士又是另一場角力，很多不法的士司機都會劏客，無法無天的！有兩個後生女仲問我地可唔可以一齊call的士搭出去, 咁我地就好努力咁call, 好彩今次我們遇上一個良心司機，肯用咪錶載我地番出西貢市中心，抵讚！，咁沿途聽到的士call 台叫車要收一百蚊小費，堅離題！
返到出去西貢就食番碗我愛的雲吞牛肚米線, 完成熱到顛攰到嘔但好開心的一次"遠征"
今次由西灣亭至東壩我們最終走了7.5小時，正路應該唔洗咁耐，不過中途我們休息左好多次，又不停影相，再加上走左去探下路（朋友仔話一定有條好行d既路去罾棚角咀，死心不息呀～～），如果不是咁多攪作，富經驗人士而不作停留只需走3.5小時吧～～
今次雖然去不到心儀的睇魚岩頂、罾棚角咀、浪茄仔，但能夠遠眺也很開心啊～～
呢度亦都係繼大浪四灣、大枕蓋、分流以外, 另一讓我們驚嘆的絕世美景, 真的是十分愛!!
流了一公升的汗, 但一切辛苦都很值得, 大自然永遠都會回贈我們, 這是行山最大的滿足感啊
抓著春天的尾巴，呢次應該係盛夏來臨前的收爐之作，而家的天氣真係堅熱喇，要等到秋天先可以繼續我”最長的旅途”了～
相信有天你會成為地理專家😁描寫很清晰啊！
回覆刪除作者已經移除這則留言。
刪除太誇張了吧, 只是陳述
刪除那張相真不錯。
回覆刪除還有浪茄仔那幅。😚
回覆刪除景色太驚喜
刪除