西貢郊遊樂之大枕蓋與吊鐘花

終於寫到今年二月的遊記，也實在太慢了吧～～

二月離職後，距離重返舊公司還有一星期的空檔，除了去了一轉快閃台北，我仲去左行山～

時值二月中，剛過左農曆新年一排，我地去左搵只有農曆新年才有的吊鐘花，地點敲定左係西貢大枕蓋～出發的時候都有少少擔心因為已經係水尾，未必會有，不過當去運動也不錯吧

飲茶乃行山前的必然動作

乘車去到西貢市中心，再轉乘往黃石碼頭的車～

我地過左北潭涌，就係上窰站落車，

之後一路向黃石方向前行，途中有不少暗斜，少做運動的我行左二十分鐘已經攰攰地，哈～～

去到呢個涼亭，左邊有一條樓梯上山的，好細的入口，好容易Miss左，要小心留意

沿路一路向上，但走十多分鐘便會有美景

萬宜水庫，辛苦也值得

一路斜，兼勁哂

呢日其實都係得十幾二十度，但真係熱到要除外套～

 雖然有萬宜水庫相伴，但一路上斜確實攞命

未見吊鐘，影下其他特色植物

繼續向斜

好熱好攰呀，呢段路全部都係上斜的

  

華，呢度勁斜呀（相機影不到有幾斜），好彩已有行山人士在兩邊拉起了繩，等我地可以扶住d繩 上去(好斜的,對新手及小童老人有一定難度), 我當然都係輪輪盡盡咁先上到去啦~~

呢個位再高些，又靚d

沒完沒了

但吊鐘係邊呀

繼續上斜，只見前面的山頭好像沒完沒了的～～但風景是絕美的

朋友仔好醒，終於發現吊鐘的蹤跡！

好靚呀，雖然呢個位不是很多，但我都影左好多相～～

見過吊鐘，總算完了心願！！雖然行到呢到都係得幾棵～～

另一邊山路也有少少吊鐘

行左兩個多小時（但我覺得快死了，攰到一個點，正常的行山人士應該不用這麼長時間），終於到達408米高的大枕蓋～～（對我這種沒有運動的人來說，確實係另一創舉）

勁靚呀～～～

三百六十度的風景，西貢美景盡收眼簾

行山最開心的，就係你永遠唔知道前面係點，只得一步一步走下去，然後辛苦過後的風景是最令人驚喜的！！甚麼汗水疲倦也忘記了！！

雖然是閒日，但沒想過遊人這麼小，來回間只見到兩三個行山人，我們在山頂俯瞰周圍，就好像只有我們啊！！

我最愛的西貢，太美了吧！！

在這裡呷一口台灣啤酒，爽！

這邊有一處山坡，發現勁多吊鐘啊～～

原來好戲在後頭，下山方向是吊鐘群所在地！！

 

影左好耐相，可惜已經開始日落，陽光不及較早前～～

下山了

 我地要向鯽魚湖方向離開

沿路還有驚喜，有黃昏景同樹林景

 要向北潭Ｘ方向返回大路

不知是否錯過了路口，走了很久也走不出大路，其時晚上七點，天已黑，真的伸手不見五指！！我未試過遇上咁黑的情況，開了電筒也只照到前面幾米的距離，左右身後都不知是甚麼！好恐怖！！

我地開了google map,又研究下漁農處提供的地圖，轉了幾圈也走不到大路，我開始覺得擔心，擔擔下望下個天，華，好多星星呀，係勁多！如果唔係咁黑，又點可以看到咁多星？？漫天星星將恐懼變為感動，感謝此刻我遇到這樣美麗的星空。定一定神，我地再走走看，終於找到出路了！

這段路本身是走3至3.5小時,但我走得慢, 又不停影相 ，最終用了差不多7小時才完成~~堅攰

呢次行山之旅很開心，一開始我地只想看看吊鐘花，最後看到西貢群山及環海的美景，還有吊鐘群，及靜夜星空，再幸苦也很值得！！

下年農曆新年一定要再來！

 返回西貢吃泰國野，為完美一天劃上句號