浮潛初體驗@西貢海下

一個月內二訪海下

天氣好像開始轉涼(明明中秋已過), 為了抓著夏天的尾巴, 我地決定再去多次玩艇同埋試下浮潛, 呢日係迎月夜!

飲個早茶先~呢間野之前限聚令無開, 而家開番, 但枱與枱之間用圍板或布隔開, 感覺好亂!

好了, 要出發, 呢日話會狂風雷暴, 但出發時天氣還好, 咁就見步行步啦

點知都未去到窩美, 我突然好肚痛, 係堅要去廁所個種(明明飲完茶已去一次), 本來絕望到想係白沙灣落車, 但實在想捱到總站, 好彩最終有驚無險, 捱到去總站的廁所! 點解我個肚咁煩架!

好, 咁又耽誤左少少時間, 見到海下架車就快開, 就九秒九上車, 連乾糧也沒有買了, 因為去海下係三十分鐘一班車, 走左就有排等~

去到海下, 今次去左馬路旁的洗手間先(可能少人用,比較乾淨) 才去租艇

今次去左雲海, 雖然沖身換衫也是簡陋, 但起碼兩者是分開的, 不會好像上次咁一路換衫一路有別人的沖身水湧進來, 乾淨企理一點, 而租艇價錢一樣, 雖然感覺上艇及浮衣好像好景較新淨, 但我如果再來, 也會選擇雲海~

好了, 今天陽光好像比之前一次好,  

我地一划出去, 很快見到海床盡是海星, 好開心! 但海星好得意, 會即刻縮入去沙裡, 讓你看不到!

去到呢個浮潛區, 但泊不到岸, 只好去WWF另一處沙灘登岸

終於係度試浮潛了!!

戴了這個面罩, 起初覺得好侷, 你知啦, 我有密室恐懼症

好彩好快適應了, 而且比傳統浮潛用具慳力

嘩, 我兩年來第一次游水! (划水, 因為有浮衣) 亦係我人生第一次在香港浮潛(第一次在沙巴)

 見到有些魚, 好多珊瑚, 但都死了一大半, 不過感覺好神奇, 我竟然可以在香港玩浮潛!

肉眼也可見的大海參

呢度魚不多, 而且有人食煙 , 我地決定划去對面

呢度好多人, 應該有多些魚

真係呀, 超多魚, 水底真係有好多珊瑚, 有海刺呀!!! 當然有海參, 仲有好多不同類型既魚, 有一隻手臂咁長既魚呀!!

而我浮緊既時候, 前方仲有一些隻眼好大既魚, 係接近水面既地方游來游去, 就好像在我面前!

呢度係一個大型既天熱水族館! 想不到香港會有咁多景色, 我地真係唔去過唔知! 好感動, 我有後悔自己在面上搽了防哂液, 以後要慎選海洋友善既防哂液!

開始有少少下雨, 我地亦想避開人潮去沖身, 所以決定划回岸上, 嘩, 好攰呀, 點解划出來唔覺, 划番入去咁遠既

又見到你了, 蚋蛇尖

呢度既沖身比較好, 雖然只係得幾條水喉, 但起碼乾濕分離, 遠離換衫位置。

跟住去乘車, 呢日比較多人, 我地等左半個多小時才上到車

返出去西貢當然要番洪記

水準真不錯, 性價比高

食食下中途遇上南亞人與店員發生爭執, 兩幫人初則口角, 繼而動武, 扔椅子啊, 拳來拳去, 好多食客走左(好像太誇了), 難得朋友仔好冷靜, 坐著觀戰, 我就即刻帶番個口罩, 因為佢地跑來跑去爆哂粗, 我係驚有菌!!

之後有人報左警, 我地就繼續食, 但大雨開始來了, 還要感恩, 因為天文台一早講呢日會有雷暴, 好彩等我地玩完先下雨~ 本來想等停雨才走, 但雨越下雨大, 沒有停下的意思, 我就話要走了, 因為回家迢長路遠

點之一行去小巴站, 傾盤大雨, 有遮也成身濕! 但惡夢隨即開始, 晚上七時十五分上車, 由紅雨一路變黑雨, 超大雨啊, 而且係極塞車, 最終後八時四十五分才返到去旺角, 好彩去到旺角就細雨番, 我怕塞車, 只會乘西鐵企番屋企

雖然迎月夜來個黑雨天, 但呢日玩浮潛真係開心, 係一次好難忘既經歷!

不過執筆時天氣已轉涼, 游水遊戲要暫停了, 因為我要做番山系阿禪啊!!

期待已久的行山日子終於回來了!