天下何處無芒草之敗走四方山

說了多年的大東山賞芒之旅，原打算今秋起行，奈何塞山情況嚴重，唯有轉移陣地，最終相中位於大帽山旁的四方山，打算一圓隊友的芒草夢~

呢日天氣突然又回升番，有廿六七度, 亦無損雅興，憧憬著可登上香港第1高峰大帽山和第4高的四方山，又可欣賞金光閃閃的芒草、像是八陣圖的怪石陣、還有棲息在大草原上的牛群，實在是令人期待～

都係飲個早茶先

 

去荃灣街市附近乘小巴

到達城門水塘

四方山來回路線均避不開我最淆底的城門水塘，那就由城門水塘出發，以大帽山作結，咁樣就算行到天黑，係大帽山離開還是比較安全（咁樣講好誤導，查實城門水塘好安全，只係我唔想摸黑行經猴子聚居地）

呢度有隻盲左既馬騮, 好慘

呢日既人潮不算多, 閒日嘛(但相信都比以前日子多人了, 疫情下, 人人也往山上去)

 

從菠蘿壩一直走，沿路有水塘、石澗、白千層等美美打咭點，不過這些也不是今天重點, 要快跑走, 未去到起點啊!

白千層一帶好多人影相, 我們無咩點影了, N年前來係一粒人也無

行經拱橋時，突然心血來潮，是否錯過了上山入口？

折返路口，唔知點解覺得左方才是正路，便決定轉左上山，點解會轉上來呢?!

走了半小時，一個路牌也沒有，一粒人也沒有，多次質疑是否行錯，需否折返，但google map顯示的方向竟又正確，(我地本身係想去鉛礦拗, 但google map我們偏離了, 但方向始終是向四方山前進的)

分叉口, 大城石澗? 咁既樣既(之後才知唔係, 可能係其中分支吧了)

在走一段路, 始終覺得怪怪的, 問朋友仔需否折返, 朋友仔話已經深入半個多小時, 不想再走回頭路,繼續行吧

半信半疑下唯有繼續向前，終遇到兩名資深山友，細問下，他說我們走的方向是對的，還介紹我們走一轉大城石澗，聽君一席話就安心了，

轉入這小路, 

這裡確實較美, 是大城石澗一隅,

參觀完大城石澗就繼續上山，沿路都係石澗、叢林，大部份時間也在深山中，看不到天空，亦沒有見到人（後來才知我們走著的叫虎蹤徑）～而且好多蚊, 咬到飛起

成條褲也痴了這種草

幾經辛苦到達肥佬麥石，大喜，因為山友表示只要見到呢舊石，右行就可到四方山，其時見到一班年輕人，本想再確認一下路徑，但他們走得太快，追不上問，而apps所顯示的位置，正正已進入四方山範圍，仍然相信沒有錯

再多走半小時，地圖顯示我們又錯過了路口，太累了, 吃小小東西先再走 (呢隻奶茶幾甜, 但幾好飲, 本身打算上到山頂才飲的)

吃完再折返搵路(後來才知應該繼續向前行, 才有機會接上正路)，

竟又給我們找到一條絲帶路！有絲帶標記，又有導航，咁就上山，上左十來分鐘已經開始要爆林，咁難行既？

 朓望大帽山, 點解仲有咁遠既, 已經差不多行了四小時

 d草越來越高，絲帶越來越少，當日行罾棚角咀既感覺番哂黎，甚至係更艱難！偏偏google map又話你啱！爆林半小時，眼看還有180m便可到達四方山山頂，但絲帶沒有了，路亦像淹沒了，天色不早，已經四點, 遙望大帽山仲係迢長路遠!! 根本入黑也行不到上去!

我們最終決定在接近600m的山頭放棄前行，沿路折返，然而有點迷路, 搵不到之前的路, 確有點擔心, 好彩搵左陣路成功返回虎蹤徑，其時已經四時多，天色開始陰暗，兩旁均有不少猴子在飄來蕩去，

但令我最不安是，在深山裡突然傳來某種動物的叫聲，聽來令人毛骨悚然，聲音自遠而近，速度很快，彷彿緊緊跟隨著，(當時朋友仔堅稱係雀, 佢後來才說只為安慰我!!) 我覺得係一個獸類, 但到了現在我們也不肯定是甚麼，幸好在返回肥佬麥石後，便再也聽不到。

抵達城門水塘已是六時多，打咭的遊人都已散去，怎麼夜晚我仍在城門水塘！誰想過會沿路折返！ 

 

著了電筒，見到不少猴子都坐在大路上，這還可接受，但去到菠蘿壩，才走下兩級樓梯，彷彿有幾百猴子在樹上飛來飛去，牠們前仆後繼，叫喊得超級起勁，我真的走不動了，在伸手不見五指情況下，如何可以進入牠們的老家？

退回大路，剛巧踫上一位獨行山人，本也打算走此捷徑，但探頭兩秒，就說：＂我地一齊行出面條車路啦，不過就兜遠d＂ ，明顯他也是淆底了. 佢仲好訝異我地竟然行左咁耐係呢座山, 話我地係深山團團轉～但我們總算找到一條比較’平靜’既路，返回車站，至此結束七小時深山兜圈之旅～

好彩去到小巴站剛好有小巴, 我地係荃灣打個邊邊, 獎勵下自己先

這次敗走四方山，是太過依賴行山apps、google map、絲帶標記、也太相信別人既指示，同時否定自己既疑慮，幸好最後還是選擇放棄，係一次深刻教訓，當真要引以為戒～

後來才知我們在拱橋位置要一直向前才可到鉛礦拗, 然後續上四方山, 明顯我們一開始已行錯!!! 最錯係爆林一段, 完全沒有準備要爆林, 好彩我地選擇放棄, 一次深刻教訓, 否則真有機會要摸黑爆林, 真係會喊!!

而呢次亦令我深深不忿, 因為行得都幾辛苦, 但沒有看到好風景, 經一事長一智, 上了寶貴一課, 就當好好鍛鍊體能吧

說過不會再行城門水塘一帶所有山脈，我是講堅的，還是回去西貢的懷抱吧

 

原定路線—城門水塘—鉛礦拗—四方山—大帽山

最後路線：城門水塘—虎蹤徑—大城石澗—肥佬麥石—四方山山腰（沿路折返）

需時：7小時

難度：3.5星(以5星為最)

景觀：2星 (以5星為最)

長度：約12.5公里

 

#當係鍛鍊體能

#一條芒草

#最懸疑的旅途

#需要放棄時切忌堅持

#山系阿禪