史上最小氣海鮮宴

朋友仔入左黎香港仔, 即興話入去南丫島食海鮮, 見咁耐無去, 就去下啦!

我地食開都係天虹(貪佢夠方便,有免費船接送), 可以係尖咀同中環上船的, 不過係香港仔, 就諗住搭街渡 (去到碼頭時, 先知原來天虹係香港仔都有船架@@), 不過係另一邊碼頭, 太遠了, 都係試下搭街渡, 船程半小時,閒日都要16蚊, 幾貴wor

不過幾有特色

乘船時候其實都諗住照去天虹, 點知去到先發現佢竟然俾人包左場!!!! 真係估佢唔到, 唯有揀其他啦, 就咁樣亂揀下.....當然又係揀錯.....

最終揀左泰苑海鮮酒家, 呢度服務態度幾好架, 洗手間就無天虹咁企理啦, 不過都唔係最重要......

我地揀左個龍蝦餐, 都要成500蚊,但係......

環境唔錯架

海蝦, 都幾細碟, 但算新鮮

見到呢碟蟶子開始勞氣, 賣相好差, 味道唔好,份量好小氣, 我情願你俾我每人一隻蟶子皇

見到呢兩小碟有少少冒煙,雖然話每人只可以算一樣, 但present 得可唔可以好少少?

呢碟龍蝦伊面算係挽回少少分數, 味道好, 份量亦合理

正常菜

太小氣了吧!!! 每人一片西瓜, 我同朋友仔都唔知好笑定好嬲, 家陣d西瓜有幾貴???

總括而言, 呢間舖頭服務唔錯, 但食物份量同質素跟收費不成正比, 我寧願去鯉魚門西貢或者三聖流浮山都好過佢, 呢間一定無下次!!