2020山系收爐作 - 蚺蛇尖

 

上篇講述我地去左丫髻山, 當時選擇呢座山係因為第四波疫情剛起, 跳舞班又停了, 但又唔想完全零運動, 始終要郁下, 不想去遠行, 又要揀些可以戴住個口罩行的山, (即係唔可以唔辛苦的), 又要避人潮, 無計可施下才選了丫髻山, 點之都係人滿之患, 當時行左一半路程時, 望住元朗工業用地, 同朋友仔講: 我好掛住海濶天空(明明相隔遠征鳯凰山也只是三個多星期的事), 朋友仔意識到我行山癮發作了, 新界西的山滿足不了我, 就話: 咪去囉~

咁樣, 就迎來了2020山系收爐作,  西貢的蚺蛇尖

我和朋友仔其實一個力主蚺蛇尖, 一個想去長咀, 最終考慮到體能與時間, 還是選了前者。(兩座山都係考驗體能與技術, 但長咀仲要再講求多一樣野------時間, 所以才揀了蚺蛇尖)

蚺蛇尖位於西貢大浪灣北面，為香港三尖之首，與睇魚岩頂及釣魚翁列為「西貢三尖」。雖然它只有468米，但因山勢險峻，多以碎石浮沙泥徑組成，故又被稱為「香港第一險峰」。

食個快閃早餐

雖然是閒日, 但去到西貢等黃石車, 仍然勁長龍, 朋友仔仲話車未開, 去行下西貢碼頭先, 好彩我拒絕左, 唔係就上唔到車(一班車好像要等半小時啊)

去到北潭凹, 大部份遊人一支箭咁進入徑二段

講講呢日天氣, 10-15度, 屯門我出門時為9度, 我好少咁凍天氣行山, 諗左好耐點著衫, 最終係一個薄運動衣、一件fleece和一件大風褸, 早晚都可以頂到低溫, 但下午登山時都幾熱下~冬天行山衣著真麻煩

登蚺蛇尖有很多路徑，小小的人當然選了最＂簡單＂的一條。從海拔130米左右的北潭凹出發，逆走麥徑二段（還是首次），

遠遠望住蚺蛇尖

一路往下走, 很輕鬆, (回程就知味道). 半小時可抵達怡人的赤徑（但最近寧謐不再），

因為迢長路遠, 我決定去赤徑的公廁(極大錯誤), 記得幾次經過呢個公廁雖然無入去, 但完全聞不到異味, 但我看輕了疫情為大自然帶來的災難, 人潮都湧到來赤徑~我雖然帶住口罩, 但未入去已聞到臭味, 最崩潰係, 入到去洗手盤位置, 已見到整個地下也是廁紙, 垃圾還有大量用過的M巾!!!! 痴Q線架, 係成個廁所也是(我到今日仍然好後悔點解我唔去北潭凹的公廁呢?!), 我估點樣都好過呢度, 人類真係很不知所謂!!

朋友仔也話赤徑從前很美, 現在很污糟, 周圍也是垃圾~來大自然的人不是喜愛大自然嗎? 我真弄不清發生甚麼事…….

快拍了幾張照片便往咸田灣方向進發，上升約150米至大浪拗，

呢段路走過很多次, 不過全部也是由大浪拗下行去赤徑, 今天係反方向上斜, 都幾辛苦. 沿路都遇到不少遊人, 人氣一點也不少

約半小時來到今天的起點。

從左邊警告牌上行，緩緩而上，很快已看到大浪四灣的景緻，這天天公作美，出發前預告陰天，登山時喜見太陽出來了，雖然只有十五六度，但有陽光照射，一點寒意也沒有。但我覺得自己負重太多, 很快已除掉fleece及風褸, 走起來很重很累, 似乎狀態不太好

從遠看起伏的山勢，尖峭巍峨的山頂，氣勢甚為迫人。

走了20分平緩山徑便抵達第二個警告牌。

朋友仔說, 係咪真係行到架~

登蚺蛇尖大致可分為四個段落，沒有一段是好走的，

這是第一段

以碎石岩石為主，斜度不算太差，慢慢上升還是可以，但沿路都聽到正在下山的人嚷著：一次好喇，唔好再搵d咁既野攪~~係呢度已經好大風, 我帽子已吹跌

第二段, 仍是碎石岩石, 當然都係要手腳並用, 好攰

第二段去到第三段，近乎60度的浮沙碎石路，當時心想，究竟待會要怎樣下山？看見有個女生在此時亦決定放棄前行～

 

回望風景也是很好

我地係度食下野, 主要係好攰, 同想減重

呢度向下有條小徑係捷徑, 可繞一半小圈返回剛才第三段斜波, 下山時可考慮使用

係呢度可以選擇左或右, 得山友指點, 左比較容易, 右要多上一個山頂

路況仍是十分差

見到我好想去的長咀

 回望身後風景, 有畏高真不惹笑

來到最後一段，風化相當嚴重，非常陡斜，唔講得笑, 必須靠邊且手足兼用才能慢慢登頂。由大浪拗起點至頂, 接近用了三小時

從山頂極目望遠方，才明白何以如此難行，也能吸引這麼多人攀登，360度全景觀賞西貢群島，從順時針看，有長咀、大浪西灣、鹹田灣、大灣、東灣、睇魚岩頂、罾棚角咀、高流灣、塔門、還有蚺蛇灣、千溪海岸、米粉頂乃至西貢群山，香港最好的風景均在眼簾下，顏值是100，辛苦都是值得～

可惜當時有霧氣, 我地又無再行前, 所以影不到千溪海岸

然而山頂極為大風，我這麼多脂肪的人也站不穩，且下山需時，怱怱拍了照片便要離開。(上山時一直有不少遊人, 但永恆的, 當我們走時, 山頭又變得無人, 點解大家都咁勁!! 定係我地體能真的這麼差!!)

上山不容易下山更是極艱難，究竟剛才是怎樣上來的，每一步彷彿也找不到隱固的落腳點，一步一驚心，想不到下山也會用上極長時間。

去到呢個位, 朋友仔揀左另一條路. 即再往下走, 行至一個位有小徑轉右(避開剛才第三段勁斜的路) 

但呢段捷徑(其實上山時也有遊人也叫我地行呢條), 它是繞了一大圈, 而且要爆林, 也不算好走, 只係可以避開剛才勁斜的路)

接番第二段, 仍然係迢長路遠, 已經要用埋pat pat才可以坐落山, 完全係攰到嘔

黃昏也是勁美

至蚺蛇拗已是日落西山，此時遇上三隻唐狗，一路亦步亦趨，至赤徑才願離開，牠們似乎是要伴隨著我們，動物比人類有時還要有心～

回到赤徑當然已沒有返回黃石的船隻，失望

朋友仔見肚餓, 好彩有士多開~ 咁就唔趕車, 食下野先

夜晚禁堂食嘛, 我地拿到戶外食, 老闆話好凍wor , 才驚覺得15度, 拿拿聲著番d衫 (件午餐肉又幾好食)

然後要拖住疲累的身軀, 再多走四十分鐘山路，返回起點北潭凹，

 

見巴士仲有廿分鐘才到, 唯有等, 係呢個時間有架紅的經過, 朋友仔二話不說截了車(當時我心諗, 其實巴士好快到, 唔洗坐的士wor), 一上車, 司機問我地去邊, 我本想講西貢市中心, 朋友仔同我講: 不如直返屯門啦, 你咁攰~我話不用啦, 講多兩講, 就決定去旺角, 說實在, 我很感激遇到架紅的, 朋友仔又俾我塔番出九龍, 我係半小時車程裡, 已經累得四肢完全動彈不得, 由頸部以下都開始痛(是因為全身肌肉都用上了), 呢二百蚊的士錢真係抵俾!

返回旺角再轉巴士回屯門, 已經為我慳省了很多轉車時間!!

這一次又係由天光走至天黑，終於圓了多年的蚺蛇夢。而我全身真係痛足四日, 從未試過的! 朋友仔說呢次係最辛苦的一次, 但我個人認為行罾棚角咀那次的經歷更累, 可能上次的時間規劃很差, 最終有一小時要摸黑行山仲要爆林, 令我猶有餘悸~

 

N年前遊走大浪西灣時，遠眺蚺蛇尖時已覺得很迷人，但山路崎嶇，路況極差，對我來說是可以遠觀而不可褻玩的路線，所以從沒有將它放在bucket list裡。如今順利走完，過程雖艱辛，但很感恩自己做到了，是送給自己今年最好的收爐禮物。

 

路線：北潭凹—赤徑—大浪拗—蚺蛇拗—蚺蛇尖（原路折返）

需時：約7小時

難度：4.5星(以5星為最)

景觀：5星 (以5星為最)

長度：約12公里

 

#最艱辛的旅途

#行到懷疑人生

#不可小覷

#感恩與您同行

#下一站長咀

#山系阿禪

 

回看2020年的願望, 一句make it happen, not just a wish~ 我走了超過140公里的山路，也算是有一點點成績，雖然面對疫情，令不少行山計劃受阻，但在可行的情況下，我們還是堅持了這一點，走遍了很多好山好水～

我從來都很討厭做運動，但慶幸我喜愛山水，所以行山可以讓我開心地多做一點運動，為身體與心靈注入正能量　（去年也透過跑步與跳舞增強心肺功能，但始終質量不足）

我們明白體能仍然比別人很遜色（這樣也是摸不著頭惱，明明也不算行得少…）每一次都係行到無哂人，包哂尾，但不要緊，慢慢走，始終會有進步，希望未來可以遠征更多心儀的山水，好好珍惜我們行得走得的日子