一起身走出露台，陰陰天，浪又大，大家都打定輸數，我們與美人魚島無緣…….
係penyu食早餐，聽到有個爸爸同個仔講，＂今日玩唔到香蕉船，可以玩其他野，要Positive D!”， 哈哈，都幾啱聽，去唔到美人魚島，去雙島遊都唔差啦，其實兩者有咩分別？
美人魚島位處外島，好遠路程，加上每日限制50人上島，換言之人少d，環境自然靚d，只有浮潛同潛水玩，水深腳不能到地；雙島遊因為位處內島，交通方便，淺水已經有好多魚同珊瑚，一定要著鞋落水，而且好多降傘、跳傘同海底漫步等水上活動玩，自然＂熱鬧＂好多。
Leon話，如果美人魚島之旅唔成行，會係7點3前通知我地，所以我地一路等佢電話，點知，7點30都無打來！！！咁即係話，我地可以去美人魚島喇！！真係皇天不負有心人！！
今次佢搵左架十人車來載我地，同行有仲有一家四去同一對外籍人士。司機兼教練是一位馬拉人，雖然唔記得叫咩名，但佢好好人呀，我地係車上簽上類似生死狀的物體，便往美人魚島進發！
沿途風光,其實都係天陰陰
車程大概一個半小時，睡了又睡，終於都到了碼頭，等齊其他人了，大約二十人便乘快艇出發！
看來風平浪靜，之後其實大浪到飛街！！
我影完呢張相後，好快就即刻收埋左部相機，因為我地即將進入左旅程最大挑戰的地方!
浪高過架船,第一個大浪撲過來,成部機差d濕哂!
呢程快艇約需45分鐘，其實佢唔係快艇，係＂大飛＂，超大浪，我可以成身濕哂，有人仲嘔埋，望向對面，只會見到一個個比快艇的浪衝過來，好恐怖！！
約10點30分，我地終於到達喇，d水係淺綠色架，真係見到底架，好開心！
見到相片較上方，黑色海水的位置，就係頭先進入美人魚島前，大浪到嘔泡的地方
其實呢個local tour會包埋所有浮潛裝備，但因為我同朋友仔驚青，所以淨係著住件救生衣同加副微鏡就去浮潛，而另一位朋友仔就係香港買定snorkel用品，始終都要用個口咬住，用私伙野會比較衛生。
呢度係稍事休息的水上屋,著好救生衣，攪掂哂d裝備，我地乘快艇出去珊瑚區，因為相機不是防水類型，所以之後浮潛沒有影相了，呢程大概係10分鐘度啦，朋友仔好似有些暈船浪….
跳海前,教練問我地有無人唔識游水,我地大概有十個人話唔識(幾歹都話自己唔識啦),佢就將我地分成三組,每三人跟一個教練,都幾安全,其他識游水的人就自己玩。
跟住d人就開始跳海!我地個教練係度一路整緊個大水泡,一路叫我地三個Jump,
呢個Jump字的確令我好猶疑,點Jump 呀?
雖然我都識游幾下,又有救生衣,但我從來都未試過唔到地,加上望到四周圍都無陸地,好似好深海wor, 點樣跳呀? 不過見到其他團友仲有我自己d朋友仔一個個咁跳哂,後面又有人咁推我向前,我就咁樣,試左我人生第一跳,哈哈!!成功喇!
我一跳落去,就即刻搵我個教練同個水泡!朋友仔原來已經捉住左個水泡喇,我好驚青咁爬去扯住個水泡,人都未定下來,已聽到我朋友仔驚呼”好靚呀”!原來朋友仔已率先微左個頭落海!
我確定自己爬實個水泡條繩,可謂驚魂甫定,哈哈,就即刻伸過頭落水,嘩!我第一個感覺係,好恐怖!!!係因為我無諗過海底可以咁靚!!!鋪天蓋地的水底都是珊瑚啊,一群群的魚在游來游去,水底世界很平靜,很遼濶,五顏六色,真係好似跌左落海洋公園的海洋館裡面!!太誇張了!!
我地捉住個大水泡,教練就扯住個水泡,一路帶我地向前游,因為我同其中一個朋友仔無用snorkel,所以不時要上水面吸氣,但其實海面唔多平靜,一上水就有個大浪衝過來,哈哈,要飲海水了!
玩左半小時,因為我地不停跟住教練游,所以都好攰,但海底真的很靚, 沒有邊際的,那些魚群自由自在的游來游去,還游到我們身邊„海星,小丑魚, 海床佈滿著奇形怪狀的珊瑚,……. ,實在很感動呢
攰到暈,我地又搭番大飛返去水上屋,食番個午餐先!
熱烘烘的食物,再望著這片人間小天堂,真的很滿足!!
沒有留言:
張貼留言