離開左詩隆古堡，我地就驅車前往Zermatt(采爾瑪特)環保城進發。此環保城周圍由36座4000米以上名峰所環繞，由於環保關係，村內只有電氣化車輛及馬車行駛。
一路上的景色都好靚，開始見到地下有雪了，好興奮，而且越來越多，亦即是天氣越來越凍，相信很快見到雪山了！
領隊話好多Motel都係假架wor,係軍事重地，擾亂敵方視線，信不信由你了
終於到達Matterhorn Terminal Tasch，呢度係山腳的地方，我地要係呢度乘登山火車，先可以去到山腰的Zermatt，領隊話有些團會住係呢度，但環境就唔及我地住Zermatt咁好wor。
我地就咁樣拖住個喼去塔登山火車了。
沿途景色有山有水也有雪，好靚，亦令人好期待。
唔洗廿分鐘車程，我地就上到海拔1620米(約五至六千呎)的Zermatt
酒店服務好好，用車＂接＂我地d行李去酒店先。我地就慢慢行番去酒店。
唔想行，可以租用的士帶你遊Zermatt，當然收費唔便宜了
嘩，見到Matterhorn了！呢個就係我地聽日要去看的馬特洪峰（又名朱古力山）！
其時已經係五點幾，天開始黑，舖頭亦陸續關門，領隊就帶我地係附近閒逛，因為聽日去完雪山後，我地下午會係呢度自由活動，所以領隊就預先同我地介紹下呢度有咩好買，有咩好食。
呢間有免費刻名的瑞士軍刀賣（唔好度度都有得免費刻名架，要記住了！）
一路行，發現地面有雪！（之前都係係架車上見到）嘩，我第一時間去摸下，我還是第一次掂到雪！！好凍呀！
今晚我地住o既酒店叫Astoria，好骨子架，我地成團人加埋d行李已經迫爆左人地個lobby，排隊等上房都等左好耐（呢度得一部只可載兩件行李的lift，最後我地只好將行李放入lift,人就行上樓去lift 口擺番件行李，哈哈），我地會係呢度住兩晚（呢度亦係我地全程唯一一晚唔洗轉酒店）。
酒店雖小，但間房好靚呀！！！仲有個90度的露台!!仲可以望到Matterhorn!不過天氣真係好凍，我地呢兩日都無咩行過出去。
而最令大家感動o既係，酒店房都有wifi!!
我地稍事休息，就出去食晚餐了。
今晚食特色餐──牛肉火鍋
可能我地唔識食，一路炸牛肉，d油一路彈出來，好危險咁！
都係薯條同意粉穩陣d
俾領隊老點，話呢支七喜溝鮮奶係瑞士出名好飲，結果每人叫了一支，盛惠每支港幣40元，但味道平平無奇（往後在超市見到一大支裝，都係賣廿來元港幣，好搵笨）
食飽飽，我地要行番去酒店，天氣越來越凍咁，頭面都赤了。但天空上有很多星星！！
行番去酒店大約要十五分鐘，返到去，其實又係忙碌的開始，我地三個人輪流沖涼不在話下，charge電才成為我們這十天最困擾的事，哈哈，得三個adapter，但要charge三個電話，三部相機，仲有煲水器同風筒！插座忙過不停，上演左好多場adapter爭奪戰！
Zermatt真係好靜，我地關上電視後，真係靜到耳鳴，唯有開少少窗，情況先有所改善。而今晚大家可以好開心咁上網了！
沒有留言:
張貼留言