大嶼南 - 觀音山、羌山、靈會山一天遊

1月中的天氣終於有點冬日感覺，呢日稍為凍凍地（約15-20度），決定行下大嶼南 (我今次係一件薄風褸, 一件fleece和一件薄運動衣, 做到可加可減)

其實選擇大嶼南，主要係想試下用屯赤隧道，過往從屯門去大嶼山，都要兜一個超級大圈，由屯門公路經汀九橋，再行番青馬大橋，明明望個去對面海就係大嶼山，都要咁轉折，不計轉車也要用一個多小時才去到東涌，從前在機場回家，住九龍或香港的朋友反而會比我快到家，咁而家用屯赤隧道情況又點呢？

如果想係屋企附近乘車去機場，我只有一架e33P，仲要係30分鐘一班，miss左真係好大穫，我本身係1X幾個站才上車, 都驚無位座,好彩呢日又有位(可能而家無咩人去機場吧)

 

由上車至東涌, 不塞車情況係用左25分鐘, 堅係快左好多, 而且時間大部份係係屯門兜, 其實出左隧道大約幾分鐘已可扯到去東涌, 不過其實要去埋機場, 我估比以前只係慳到十幾分鐘, 所以覺得呢條隧道最有用的是, 當你乘的士的時候!

好了, 要入番正題, 我地今次繼續找些名氣稍遜的山徑走走，呢日仲決定一口氣行三座山，好貪心

吃個超快早餐

避疫下, 去大嶼南的巴士都是長長的人龍

巴士沿路沒有提示, 我地都係跟人估估下落車

從深屈道落車, 向後行會見到一個大草原, 就係今次出發點，

執整後就出發了, 我記得出門口時大概只有13,4度, 但來到呢度已經有16,7度,
前面就係今日第一個要登的山, 觀音山

經鳯凰徑五段上走，沿路為平整有序的山徑，路面狀況非常好，

約半小時可見第一個路口往觀音山, 

此路為非官方山徑, 有少少難行, 約15分鐘便可登上434米高的觀音山，直望便是高聳入雲的鳯凰山（多麼想再去一次），旁邊則是石壁水塘，遊人比我想像中多，也遇到不禮貌的遊人, 怱怱拍了照便離開～

我們十分喜歡的鳯凰山

沿路折返至路口繼續前進，上上落落，坡度也頗費勁，而且沒有太多樹蔭，曝曬指數甚高，但沿路風光如畫，一邊是大海，另一邊是水鄉大澳，

一路行都有不少遊人, 疫情下即使再冷門的山也都是人頭湧湧(不過呢度始終已經係比較少人了)

去到呢度好熱好攰, 決定休息下

再上一個一大片平原咁

花掉約１個多小時終登上這天的重頭戲、高459米的羌山，這裡視野非常廣，360度環視大嶼南景緻（有我念掛的分流！），山崗還有一大片芒草海（兩個月前來應該更震憾），遊人全都聚集於此處

因為迢長路遠，只是小休片刻便繼續趕路～

走約半小時便到了靈會山的分叉口，可選擇前往萬丈布方向離開，也可選擇繼續登山，大部份遊人只為羌山而來，多數會下山，但既然一場來到，就決定向靈會山進發，這裡開始便見不到人咁滯!

沿路都是無敵大海景，路況很好，不過無咩樹蔭, 行起來也很熱很累

約花大半小時終登山490米的靈會山，風景似乎比羌山更勝一點，遠至索罟群島亦可看見，而這裡亦只遇到兩組遊人，終於可靜靜享受眼前美景～

然後沿萬丈布經龍仔方向下山，一路上上落落, 都幾攰

中途會經過從前為香港十景之一的悟園，

4公里卻要走2小時，不算輕鬆，幸好沿途景色不缺，再沿羌山郊遊徑

往大澳，(呢段路只餘到一組遊人)

 

有野生柑, 朋友仔摘了一個, 好酸的

最後呢段路都幾斜幾難行

返回大澳了! 貪吃的我買了杯薑茶

行番出去遇日落美景

夜晚禁晚市堂食, 我地在六點前入左間食店, 吃個快飯, 味道一般啦, 不過有飯食已經好好

7時許去等巴士返東涌, 勁多人呀, 等左足足三班車, 企左45分鐘先上到車, 攰到呢

不過幸運的, 係東涌消防局落車, 行個對面等左幾分鐘就有返屯門的車, 記得朋友仔遲我幾分鐘上車(佢返九龍), 我話我啱啱出左隧道, 去到屯門碼頭, 朋友仔話佢先係青馬收費區!! 我第一次覺得好優越呀, 我竟然終於唔洗包尾(平時同九龍區的朋友仔出街, 永遠人地已經返到屋沖埋涼, 我仲可以係屯門公路!!) 呢一刻我覺得終於有一個地方我可以快過人返到屋企了! 好滾動啊!! 不過最終因為我都要兜一陣, 所以朋友仔都係遲我幾分鐘就返到屋企, 我可以用半小時左右由東涌返到屯門, 真係好amazing)

 

但這天首次使用屯赤隧道，想起當年跟某班人常到這個工地指指點點，真係有種回頭已是百年身的感覺，慶幸我已經鳥倦知還啊

 

路線：深屈道—觀音山—羌山—靈會山—萬丈布—龍仔—大澳

需時：6.5小時　（不走觀音山及靈會山，可減省約2.5小時）

難度：3星(以5星為最)

景觀：4星 (以5星為最)

長度：約10.5公里

 

#最多山頭的旅途

#食唔到大澳沙翁

#愛上鳯鳯徑

#遙望狗牙嶺

#真係行到?

#下一場長咀

#山系阿禪