運動札記

（以下呢篇野其實寫完一兩個月了，但一直唔記得post，諷刺係，呢段日子身體有很多小毛病，身邊的人都係，除左荷包大出血（確實是睇到可以買到兩部iphone 6了），最重要令我明白「身體健康」呢四隻字有幾咁重～～～係相當之重，重中之重，錢原來不是萬能，即使是小毛病，當佢輪住黎纏繞都真係好慘，所以大家都要有良好飲食習慣，要做運動，好好保養自己～～祝願大家都要身體健康呀～～）

運動札記

查實我係一個運動懶人，即係唔多做運動的人，不過好想寫一篇有關運動的感想，希望提醒自己要加加油～～

2014年應該是我近十年來，比較肯做運動的一年。因為年紀大，體檢報告唔多靚，身體亦開始出現很多小毛病，體重又只升不跌，我開始明白運動的重要性（太遲了吧），做人不能完全無運動呀～～

其實呢幾年都有跳下舞，但不是常規，2014年立下決心，大概一星期去跳一次，這項運動很好玩，流汗量極多，而且比較有趣味，所以keep 得幾耐下～～可惜我上開的班別最近不再開班，其他時間又唔太啱，所以唯有另覓其他團體，但貴好多呀，不過無辦法啦，原來太耐唔做運動真係會唔慣架，已經報左3月的課程，要努力！！流汗的感覺真的很好！！

2014年首半年我行了很多山，應該是說，每星期都會同媽媽去行山晨運，每次行兩至三小時，呢種運動要付出更大體力，每次行到上山頂都是汗流浹背！！但每次去到山頂見到好靚既景色又會好開心。而因為同跳舞雙管齊下，那半年我真的瘦了！！起碼不用包包面吧～～可惜之後媽媽腳患越來越嚴重，不能走斜坡，行山運動唯有暫停（我仲未發展到可以自己一個人行呀～～）

為左彌補沒有行山而失去的運動量，2014年下半年我開始跑步，但我發覺跑步需要的決心要大很多很多很多～～跳舞因為俾左錢所以會去～～行山因有伴所以也會去，但跑步呢，意志真的要好堅定，在家中要突然的起心肝換套衫落街跑已經係一大挑戰，落街之後一個人無人敦促又係一個問題，跑一兩個圈太攰就會想返屋企～～而且趣味性可以話係零，所以我其實唔太鐘意跑步，而家最叻都係一個月跑兩、三次，係有必要加大密度呀～～

做左一排運動，雖不至愛上，但有時抽唔到時間去做，就會覺得好唔慣，尤其係大時大節食左好多甜品，打邊邊呀，燒烤呀，放題咁，唔做下運動會好罪惡，覺得好多野囤積係腸胃度，雖然好似我咁hea咁樣做運動，係唔可以瘦到幾多身，但都好過完全唔郁，繼續囤積脂肪。（自我安慰中～～）

做運動最開心，係出一身汗之後沖番個熱水涼，那時候我會好覺特別精神，Keep 住流汗，強化心肺功能，Keep住可以瘦身，已經同朋友仔商討一星期打一次羽毛球大計（希望唔好又係得個講字）2015年加大力度！！！我要瘦呀～～